gaawo hiyey fandi dogoo © 2006  foto: šeeku siise

 

Ma si kay! Nee ti marga doo, kaŋ ga borey kul bisimilla, taka kul kaŋ ti ngey misey.  Ir laasaaboo ti boro foo kul nda ceroo si hima. Adiši, boro kul goo nda nga boŋ lakkalloo, nga boŋ anniyaa wala nga boŋ bayraa.  Baa kaŋ ir si poliki tee nungoo woo ra, ir ga polikiteekey beerandi, ir ga haŋa jer i se, nd'i selaŋ ir se.  Baa kaŋ koyraboro (soŋay) senni se ir ga Internet dogoo woo cin, ir anniyaa ti kaŋ Maali nda Afiriki senney kul ga hima ka duu ngey dogey anduɲɲaa margadoo taagaa ra.  Zaman mise noo, ir zamanoo misoo – woo kaŋ se i ga ne “Web” (Tataaruhugu), sanda tataaroo hugoo kaŋ boro si diya, amma a goo ir jine, a g'ir fondaa ra. Tataaroo hugoo da manti kala fondaɲaa. Boro kul ga hinka, wala ir ma nee, boro kul ga hima ka nga boŋ fondayzoo fasal, ka fatta fondaɲaŋoo ga.  Maali senney kul ga hima duu ngey boŋ dogey: banbara senni, kaŋ ti koyra senni beero, fulan senni, dogoŋ senni, soniŋke senni, senufo nda miɲanka senni, hasonke senni, surgoboro senni (kel-tamaašagt), laaraw senni, boobo senni, mallinca senni, boozo senni... nda senniizey kul kaŋ ga fersa ka hun i ga.  

 

Ir ga nee kaŋ senni kul si hima ka tee dabirji wala kali. Senni mma borey nda nungey feeri cere ga, a ma koyra borey nda borey kaŋ ga senni waaney selaŋ marga.  Ir laasaaboo ra, surguboro senni ka hima ka tanba ka tonton koyraboro sennoo ga nee, ka tee ir se goysenni.  Zamanoo senni beeri hinza ga haŋga soŋay senni sohõo da: almaŋ, angele nda faranse.  Gaawo lokkoliizey kaŋ g'i selaŋ wala i g'i caw ga hinka hantum ngey alwaddey se koyra waaney ra – kaŋ goo Afiriki wala nungu tana foo ra. Tammahãa ra, i ga hima ka selaŋ nda ngey zamankašiney, ka faham andunñaa se, ka tonton ngey bayraa ga, wala ka duu ngey boŋ lakkalley feeri.